Vorba le Romengi – Romanien ääni
Romanikirjailijoiden kansainvälinen kokous
17.-19.11. 2001, Deutsche Wellen kutsumana
Kölnisko auridiiben
vaaguno dielos
Ame, romano liinesko ranniboskiire ohtato Europako Themmeta, koonen dikne tsetanes peen aro Köln 17.-19.11.2001 Deutsche Wellesko bihimen, ame sam tenkadam te tseeljaven internationaalo romano liinesko ranniboskiirengo staggos.
Staggos avela te tseeljaves aro ofisiaalo samliba, so ame rikkavaha aro Baro Fooros / aro Karjaa niijalesko tiijaha berh 2002.
Samlibosko stellibosko khaal hin tseeljade buttiako skokka, savo leenda aahhena ajasaave liinesko ranniboskiiren:
Veijo Baltzar, Finitiko Them
Lick Dubois, Ranskako Them
José Heredia Maya, Espanjako Them
Mariella Mehr, Italiako Them
Jovan Nokolic, Kakjako Them
Margita Reiznerová, Belgiako Them
Alexian Santino Spinelli, Italiako Them
Staggosko heerunobuttia hin te siilaves romano liinesko ranniboskiirengo naaluno horttiba ta te aanaves lengo liineskobuttia aro komujengo dzaanibosko ring, vahka doola aahhenas ranle lengo iega tsimbeha.
Ame kammaha te den naaliba romanokulturesko dzoraleske amengo iega komujengo mahkar, te dzoraljaven baaride rannibosko buttia ta panna bohlaven romani tsimbako frohlaagibi ajaseeveske nevo liinesko rannibosko tsimbeske.
Ame kammaha te dzoraljaven terne romano liinesko ranniboskiiren jelpibosko louvesko nisjaha, stipendjaha ta vauhe nisjaha. Iek ajasaavo faniba aahhelas sakko berh internationaalo Amico Rom - fendibosko freistiba, so rikkavena aro Lancianos, Italiako Them.
Kölnisko auribiiden,
vauro dielos
Ajasaave oppenbaaribosko stedi sar, Hertfordshire Press, Baro-Britanniako Themmesko universitetos, Wallada (Ranskako Themmeta) ta Drava (iidakoVollako Themmeta), so aahhte aro Köln, hin tenkade te tseeljaven Romano liineskotseer, kai laha te den auri romano liinesko ranniboskiirengo liineskobuttia. Ahe rootavaha vaure themmengo oppenbaaribosko stedi, koonen kammena te aahhen niina aro dai buttia. Romano Liinesko Tseeresko buttia avena te oppenbaaraven romani tsimbeha tavaure europako tsimbeha.
Amengo heeruno buttia hin te den pindziba ta oppenbaripa aro hilo Europa, ajasaave liinesko buttiage, so romaseelen hin kokares tserte. Jakkes doola avena te pidzimen sar iek dielos bolibosko liineskiiribosta.
Dauva pogramosko latso aavibosta na avela tsii, ke ame na laha thaanengo ta internationaalengo institutuinaalengo louvesko jelpiba ta niina kokaro sponsorengo jelpiba.
Aro köln 19. pahosko tsoon 2001
 |